LEGAZPI CITY- Matrayumpong na-dismantle kan mga otoridad an sarong drug den sa ikinasang operasyon sa Barangay Peñaranda, Legazpi City, Albay.
Segun ki Philippine Drug Enforcement Agency Albay Provincial Director Noe Briguel sa intrevista kan Bombo Radyo Legazpi na naarestar an subject kan operasyon asin duwang user na naabutan sa nasabing pot session.
Pigkakarkulong nasa poco mas o menos 20 grams nin shabu an narecover kan mga otoridad na may market value na P136,000.
Napag-araman na an high value target na suspek an dati ng na-convict asin nakulong alagad liwat na nagbalik sa iligal na kalakaran makalihis na makaluwas sa kulungan.
Mientras tanto, sinabi ni Briguel na antes ikinodusir an operasyon, nagkaigwa muna nin serye nin mga surveillance an mga otoridad ngani na maasegurar na imbwelto talaga sa illegal drug activities an mga suspek.
Dugang pa kaini na naghagad man sinda nin suporta hali sa barangay antes na isagibo an buy bust operations.
Nanindugan an opisyal na kinakaipuhan na magin seryoso sa paglaban sa iligal na kalakaran kan droga ngani na mamantenir na matrangkilo an komunidad.
