Padagos an imbestigasyon kan mga awtoridad sa nangyaring banggaan kan van asin trailer truck sa Purok 3, Quarry, Barangay Sampagar, Damulog, Bukidnon poco mas o menos alas 3 nin hapon kan Agosto 11, 2025, na nagresulta sa pagkagadan kan drayber asin pagkalugad kan limang madre asin sarong monghe.
Binisto an nagadan na biktima na si Fredo, 66 anyos, residente kan Sinayawan, Valencia City.
Segun sa report, pasiring suboot sa Cotabato City an Nissan van na pigmamaneho ni Fred, lunad an limang madre asin sarong monghe hale sa San Jose Monastery sa Malaybalay City.
Basado sa inisyal na impormasyon, biglang nagbalyo nin lane an trailer truck na pigmamaneho ni alyas Don, 29 anyos residente kan Sarmento, Parang, Maguindanao, rason na magkabangga an duwang behikulo.
Huli sa kusog kan pagkakabangga, nagsapo nin seryosong lugad sa saiyang lawas si Fred na tulos man na idinalagan sa ospital, alagad ipigdeklara ining dead on arrival kan mga doktor.
An mga madre asin monghe nasa marhay na kamugtakan, alagad padagos pa man giraray sindang pigtatawan nin atensyon medikal.
Temporaryong nasa kustodiya kan Damulog Municipal Police Station an driver kan truck para sa magkakanigong imbestigasyon asin disposisyon.
