LEGAZPI CITY – Pigbuksan na kan Department of Public Works and Highways Bicol an two-lane traffic sa Andaya Highway kasunod kan pagruso kan mga byahero asin motorista na paluwas sa rehiyon durante kan pagtatapos kan holiday season.
Marurumduman kaya na kan Disyembre kan nakalihis na taon, nagkaigwa nin soil erosion sa lugar na nagkawsa nin ulang asin gabat sa bulos kan trapiko huli sa pinaotob na one lane policy.
Segun ki DPWH Bicol spokesperson Lucy Castañeda sa intrevista kan Bombo Radyo Legazpi na napakaray asin passable na an mga tinampo para sa gabos na klase nin mga behikulo sa naunambitang highway.
Huli kaini, nasa maayos na man an kamugtakan kan bulos kan trapiko asin dae na nag build-up an mga behikulo.
Nagtetenir na naka standby an saindang mga ekipahe nganing tulos na maayos an dae piglalaomang aberya sa nasabing tinampo.
Pigtaram pa kan opisyal na mawot kan saindang director na maisabay sa 2026 budget an pagpapakaray kan tinampo nganing mapagaan an buhay kan mga motorista asin byahero.
Pigpaplanuhan kan ahensya na gibuhong 4 lanes an gabos na tinampo nganing may magagamit na extrang lane enkaso may dae pwedeng maagihan sa mga ini.
Nagtapos na man an saindang motorist assistance kan Enero 2 kun sain natawan ninda nin tabang asin asistensya an mga nagkapirang byahero na palaog asin paluwas sa rehiyon na nagselebrar kan holiday season.
Pangapodan ni Castañeda sa publiko na magin maingat asin ibitaran an pag counterflow nganing maray asin matuninong an bulos kan trapiko partikular na sa Andaya Highway.
