Nanindugan an Department of Justice na wara pang ipigpapaluwas an International Criminal Court na ‘warrant of arrest’ laban kay Sen. Bato Dela Rosa.
Taliwas sa naenot na rebelasyon ni Ombudsman Jesus Crispin ‘Boying’ Remulla, pigtawan linaw kan kagawaran na wara pa sindang nareresibi na ‘arrest warrant’ hale sa International Tribunal.
Kan nakaaging Sabado kaya, ibinuyagyag mismo ni Ombudsman Remulla na igwa ng inisyu an nasabing korte na ‘warrant of arrest’ laban sa senador.
Alagad sa isinagibong pulong balitaan man kan Department of Justice ngonian na aldaw, ipigdoon ninda na wara pa sindang kapot na kopya kan kasuguan.
Ini mismo an pigtawan doon ni Chief State Counsel Dennis Arvin L. Chan, mapadapit sa impormasyong igwa nin arrest warrant.
Siring man, ipighayag kan Department of Justice na saindang pig-aadalan an kun anong lakdang an dapat gibuhon enkaso mag-isyu nin arrest warrant an International Tribunal.
Ipigheras ni Chief State Counsel Dennis Arvin L. Chan na duwa an pigkokonsiderang opsyon, ini an pag-surrender o extradition kay Sen. Bato dela Rosa.
Alagad saiyang paglilinaw na an mapadapit digdi an puro mga teorya pa sana huli ta wara asin dae ninda nahihiling pa an kasuguan enkaso igwa man.
Mantang sa nagin paghahapot kan Bombo Radyo, ipigheras man ni Prosecutor General Richard Anthony Fadullon kun kay sisay o ahensiya dapat enot na maaraman an mapadapit sa pag-iisyu kan arrest warrant hale sa ICC.
Maagi suboot muna ini sa Department of Foreign Affairs, kasunod sa Philippine Center on Transnational Crimes asin saka pa sana maipapadara sa manlain-laing mga ‘law enforcement agencies’.
