Ipinaubaya na ngonian kan Department of Justice sa Office of the Ombudsman an mga reklamong ‘malversation’ laban ki Sen. Joel Villanueva.
Sa sarong entrevista, ipinahayag ni Justice Spokesperson Atty. Polo Martinez na an tanod-bayan an madesisyon kun ano an mga lakdang o aksyon na saindang gigibohon sa mga reklamo.
An Ombudsman suboot an magibo kan pinal na pagrepaso nganing madeterminaran kun igwa nin supisyenteng rason asin ebidensya nganing magsangat nin kaso sa maninigong korte.
Aminado siya na bako an Department of Justice an may hurisdiksyon sa kaso kundi an Office of the Ombudsman huli ta an imbweltong opisyal an labi sa Salary Grade 27 .
Ipinaliwanag kan tagapagtaram na nagpoon sana an departamento kan imbestigasyon kan ipigdesignar asin i-deputized sinda kan tanod-bayan para sa siring na mga reklamo.
Inasegurar man ni Department of Justice Secretary Fredderick Vida na padagos an saindang koordinasyon sa Office of the Ombudsman.
Sisiguraduhon suboot kaini na an mga reklamo o kasong kapot kan departamento dapit sa mga maanomalyang flood control projects an tulos na maipapadara o ita-transmit sa Tanod-Bayan.
Syesyertuhon suboot kan Justice Department na wara nin pending sa saindang opisina, urog na kun igwa nang resulta kan mga imbestigasyon.
Alagad, aminado man an kalihim na an anuman na resolusyon kan DOJ Prosecutors an bako awtomatikong isasakat kan Ombudsman sa korte.
Pwedesir suboot na ibasura ini kan tanod-bayan sa suway o independienteng review na gigibuhon kasunod kan imbestigasyon kan departamento.
