Nagpatanid an Department of Health (DOH) sa publiko laban sa online scams na nag-eendorso nin mga bulong para sa hypertension o mataas na presyon nin dugo.
Sa iniluwas na advisory kan DOH, inabisuhan kaini an publiko na dae magtubod sa mga website o page na pig-aarog an DOH asin mga nagkakatawan digdi nganing magpabakal nin mga produktong pangbulong sa hypertension.
Tinawan-duon kan ahensya na warang patunay na bulong sa kamatean an nasabing mga produkto asin dae man maendorso an DOH nin komersyal na produkto.
Kaya pig-abisuhan kaini an publiko na sa official website kan DOH sana sumangguni ngani maibitarang mabiktima nin scam online.
Nagpagiromdom man an DOH na mag-ingat sa mga mapanlinlang na marketing strategy na maggamit nin pekeng testimoniya, pekeng endorsement gikan sa mga eksperto asin panluwas na mga pahayag mapadapit sa salud.
Mientrastanto, nai-report na man kan DOH sa Department of Information and Communications Technology (DICT) an pekeng account asin naggigibo na man nin lakdang nganing mapanimbag sa ley an mga nasa likod kaini.
Pinatanidan man an publiko na ireport an mga siring na fake accounts asin dae na ipag-share pa sa iba.
