LEGAZPI CITY – Pinag-iingat kan Department of Health (DOH) Bicol an publiko mapadapit sa huma kan pagtaas liwat kan kaso nin Holiday Heart Syndrome.
Segun ki DOH Bicol Health Promotion Unit Head Monrey Isaiah C. Mancilla sa intrevista kan Bombo Radyo Legazpi na an Holiday Heart Syndrome iyo an marikas asin iregular na pagtibok kan puso na kawsa kan “binge drinking” o labing pag-inom nin arak.
Basado suboot sa mga pag-aadal an napag-araman na 51% kan mga pilipino an positibo sa binge drinking kun sain sa naunambitang numero an pito sa sampulong pilipino na labing nag-iinom nin arak iyo an mga lalaki.
Pwedesir man na mangyari an Holiday Heart Syndrome sa mga tawong dati nang may helang na kamatean alagad posible man na maka-eksperyensya kaini an mga tawong may mabaskog na salud.
Pigtaram pa kan opisyal na mamatean kan sarong tawo an nasambitang syndrome sa paagi kan pangungulog nin daghan, shortness of breath, pangluluya, pagkahilo, asin pagkawara nin malay.
Importante man na madara tulos an sarong tawo na nakakamate nin Holiday Heart Syndrome sa hospital nganing ma-diagnose asin maagapan.
Nganing maibitaran an pagkaigwa nin nasambitang helang ngonian na holiday season, pagirumdom ni Mancilla sa publiko na ibitaran an labing pag-inom nin arak, over-eating, mantang dae paglingawan an pag-ehersisyo urualdaw.
