LEGAZPI CITY-Nagsagibo nin disaster preparedness seminars asin iba pang aktibidad sa paghahanda sa kalamidad para sa mga miyembro kan Pantawid Pamilyang Pilipino Program (4Ps) sa Barangay Dapdap, Legazpi City.
Segun ki Barangay Dapdap Legazpi City Chairman Honorable Glenn Barcelon, sa intrevista kan Bombo Radyo Legazpi na magayon na opurtunidad an pagkokondusir nin seminar para sa mga 4ps katakod kan saindang family development session sa kada bulan.
Pinagolayan ninda an pagpreparar enkaso igwang kalamidad siring kun ano an mga hazard asin an mga isasagibong preparasyon kasunod kaini.
Pig-orient man ninda an mga miyembro kaini manungod sa pagpreparar kan mga kagamitan siring kan ‘go bag’ asin iba pang mga kaipuhanon sa panahon kan kalamidad.
Magkakaigwa man sinda nin Tsunami drill para sa enot na kwarter kan taon kasunod kan isinagibong Fire drill kan saindang konseho.
Mensahe kan opisyal sa gabos na mga miembros, na kun ano an naukudan, an ibarewas man ini sa saindang mga kataraid na harong asin laoman na magpartisipar sa mga masunod pang aktibidad sa saindang lugar.
