Nakatalaan na makipag-olay si Department of Foreign Affairs (DFA) Secretary Ma. Theresa Lazaro ki China Foreign Minister Wang Yi ngani na tukaron an bilateral relations sa pagultangan kan Pilipinas asin China.
Ini an inanunsyar ni DFA spokesperson on ASEAN matters Dominic Xavier Imperial kasabay kan weeklong meetings asin conference kan foreign ministers kan ASEAN sa nacion na nagpuon kasuudma asin madurar hasta Biyernes, Hulyo 24.
Habo man pangenotan kan opisyal kun posibleng tukaron kan duwang diplomat an ipinaluwas na AI-generated video kan China Daily na naglaladawan kan mga Pilipino bilang unggoy asin paglapastangan sa 2016 arbitral award.
Alagad nagtutubod an DFA official na importante an nasabing engagement huli ta tutukaron an bilateral relations sa pagultangan kan duwang nacion asin iba pang orolay na may epekto sa rehiyon asin ASEAN.
Sa presente wara pang nabanggit si Imperial na petsa kun nuarin magkakaigwa nin meeting an duwang opisyal.
