LEGAZPI CITY – Buminaligtad sa katahawan kan national road kan Barangay Milaviga, Caramoran, Catanduanes an sarong delivery bus.
Napag-araman na may kargang mga construction materials asin grocery supplies an nasabing behikulo.
Sa nagunong impormasyon kan Bombo Radyo Legazpi, pigbabaybay kan bus an dalan sa may Panabananon area partikular na sa pakurbadang parte kan tinampo kan biglang magpundo an makina kaini.
Katakod kaini, nawaran nin kontrol sa bus an driver mantang nag-atras pa suboot an behikulo.
Swerte man na dae nakaag sa mas malalang aksidente an driver na binistong si Vicente Lumbreza, 41-anyos asin pahinante na nakalukso antes pa man magbaligtad an bus.
Nagpadagos pa suboot sa pag-atras an bus hasta sa sumampa sa gilid asin mag-ikot.
Nawarak man sa tinampo an mga semento asin iba pang karga kan bus.
Pig-aaram pa sa ngonian an kabilugang danyos na causa kan nasabing insidente.
