Dapat maghanap nin ibang depensa an mga abogado ni dating Presidente Rodrigo Duterte imbes na gamiton an argumentong kidnapping sa kasong crimes against humanity na isinangat laban saiya sa International Criminal Court (ICC).
Ini an pahayag kan Malacañang kasabay kan confirmation hearing kan dating Presidente sa Hague, Netherlands ngonian na Lunes.
Segun kay Palace Press Officer Atty. Claire Castro, an argumento kan pagkidnap an sarong intriga na pinalakop kan mga miembros kan DDS (Duterte Die-Hard Supporters), asin bako ini katuyuhan na ipahiling na warang nangyaring garadanan sa saiyang war on drugs.
Dapat maghanap na nin ibang depensa an saiyang abogado, huli ta an argumentong kidnapping an sarong intriga na pigbubusol kan DDS, segun ki Castro.
Pigtawan doon niya na bako kapanu-panubod an argumento na pigkidnap si Duterte pasiring sa Netherlands, huli ta igwa siyang doktor asin abogado na nag-ataman saiya antes siya iturn over sa ICC.
Dugang pa ni Castro na sinabi kan dating Presidente mantang nasa eroplano na inako niya an gabos na pagkagadan na nangyari sa nasyon, alagad ngonian binago niya an saiyang pahayag asin pigbabasura an mga alegasyon na may kinaaraman sa mga garadanan sa Pilipinas sa irarom kan saiyang administrasyon.
.){kind=link}