LEGAPZI CITY-Nagsakat na sa 38 an numero kan mga nagadan sa nangyaring magnitude 7.8 na linog na tuminama sa baybayon kan Sarangani Lunes nin aga, Hunyo 8, 2026.
Basado sa pinakahuring report hale sa Office of Civil Defense (OCD), apat an nawawara mantang 478 an naireport na irido sa sakuna.
Segun sa ahensya, kabale sa pinakamatinding naapektaran kan linog an General Santos City, Sarangani, asin South Cotabato.
Kadakol man na mga pamilya an napiritan na mag-ebakwar huli sa danyos na dara kan kalamidad sa saindang mga harong.
Labing sa P562.8 milyones man an pigkakarkulong kantidad kan danyos sa mga imprastraktura sa Davao Region asin SOCCSKSARGEN.
Mientrastanto, padagos man liwat an namamatian na aftershocks sa nabanggit na mga lugar.
Susog man sa report kan Philippine Institute of Volcanology and Seismology (PHIVOLCS), nasa 1,209 aftershocks na an nairehistro poon kan enot na mangyari an linog.
Basado sa mga report, naga-abot ini poon sa magnitude 1.3 sagkod 6.4.
Sa presente, nakatutok an mga otoridad sa search, rescue, and retrieval operations sa mga apektado asin nawawarang mga indibidwal.
Nasa 2,700 na personahes naman hale sa Armed Forces of the Philippines, Philippine National Police, asin Bureau of Fire Protection an ipinadara sa mga apektadong lugar ngani na magtabang sa mga operasyon.
