LEGAZPI CITY-Suminakat na sa labi 140 katawo an nagadan huli sa mahiwasang pananalasa kan bagyong Tino partikular na sa Visayas asin Mindanao mantang nasa 127 pa an nairehistrong nawawara.
Naenot nang kinumpirma kan National Disaster Risk Reduction and Management Council (NDRRMC) basado sa datos ngonian na aldaw an nagrapado na sa 114 katawo an nagadan alagad nadugangan ini nin 28 pa hale sa Cebu kun sain pinakamatinding nanalasa an bagyong Tino.
Sa Cebu an ikalawang landfall kan nakalihis na bagyo kun sain nakadanas nin matinding pagburos nin tubig-baha sa mga banwaan asin ciudad.
Nagkapirang mga behikulo man an inanod asin nalubog asin abot an tubig-baha sa atop kan mga kaharongan an pagbabaha.
Nakapagtala man nin casualty sa Negros Occidental, Negros Oriental, Agusan del Sur, Southern Leyte, Antique, Bohol, Capiz, Iloilo asin sa Leyte.
Kairiba man sa mga numero kan nagadan an anom na crew members kan military helicopter na buminagsak mantang nagsasagibo nin relief mission sa mga sinalanta kan bagyong Tino.
