LEGAZPI CITY – Nagpahayag nin pagkontra an Gabriela Bicol sa pagbuhay kan padusang kagadanan sa Pilipinas.
Ini makalihis na makapasar sa ika-tulo asin huring pagbasa kan Kamara an death penalty bill na pinaboran kan 217 kongresista asin hinaboan kan 54 mantang 1 an nag-abstain.
Sa intribista ki Jen Nagrampa, tagapagtaram kan Gabriela Bicol, sinabi kaini na bako pantay an hustisya sa nasyun kun kaya bako pa magkakanigo na maipautob an nasambitan na propuesto.
Sinabi pa kaini na dapat munang patanuson an sistema kan hustisya antes na liwat na maisabatas an padusang kagadanan.
Para suboot sa lado kan Gabriela Bicol, kun in kaso magbalik an death penalty, dapat man na sentensyahan kaini an mga tawong napatotoohan na nagkasala nin rape.
Mientrastanto, maogmang ipigheras man ni Nagrampa na halangkaw na an kaaraman kan mga jovenes dapit sa karapatan kan mga aki asin kababaihan huli na man sa saindang nagpapadagos na information dissemination campaign.
