LEGAZPI CITY – Ikinaugma kan manhamiento kan Bicol University College of Medicine an naguno nindang trayumpo sa March 2026 Physician Licensure Examination.
Segun ki Dean Dr. Ofel Samar-Sy sa eksklusibong intrevista kan Bombo Radyo Legazpi na dae niya maipaliwanag an saiyang namamatean huli sa trayumpo kan mga estudyante na mga lisensyadong doctor na ngonian.
Dae man suboot siya nasurpresa na may mga estudyante sinda na magigin topnotcher urog na an nag top 4 na si Dr. Iran Viñas Brotamonte na may 89.58% rating asin an naabot kan saindang departamento na 77.78% passing rate.
Nagin angat man sa sainda an enrollment kan naunambitang batch huli sa pagkakaigwa nin lockdown kawsa kan Covid 19 Pandemic na nagpababa kan saindang kakayanan na magtanggap nin dakol na mga estudyante.
Piglalaoman man kan opisyal na maguguno ninda an 100% passing rate sa mga masunod na Physician Licensure Examination huli ta nagtutubod siyang dae dapat matapos an saindang paghihingoa maski halangkaw na an nakuwa nindang passing rate.
Pig-omaw man ni Samar-Sy an Bicol University sa pag-oofresir nin scholarship nganing makatipid an mga estudyante sa pag-abot kan saindang mga pangaturugan.
