Nahahampang sa mga reklamong kriminal asin administratibo si dating Department of Budget and Management (DBM) Sec. Amenah Pangandaman katakod kan suboot iligal na paglipat kan bilyun-bilyong pisong pondo hali sa PhilHealth asin Philippine Deposit Insurance Corporation (PDIC) pasiring sa National Treasury.
An reklamo an ipigsunad ni Dr. Tony Leachon sa Office of the Ombudsman kontra ki Pangandaman para sa suboot technical malversation, graft, asin iba pang administratibong bayolasyon.
Nakalaag sa reklamo na dapat suboot na isabay si Pangandaman bilang respondent huli sa papel kaini sa pag-aprubar asin pagpapaotob kan mga lakdang katakod kan kontrobersyal na paglilipat kan pondo mantang siya an sekretarya kan DBM.
Kaibanan sa tinutukoy sa reklamo an paglilipat kan P60 billion sobrang pondo kan Philippine Health Insurance Corporation (PhilHealth) asin P107 billion pondo kan PDIC sa national treasury.
Sinabi sa reklamo na parte suboot si Pangandaman kan “concerted and coordinated governmental action” sa implementasyon kan fund transfer mechanism.
Marurumduman na kan Disyembre kan nakalihis na taon, ipigsugo kan Korte Suprema sa gobierno na ibalik an P60 billion sobrang pondo kan PhilHealth sa paagi kan 2026 General Appropriations Act (GAA).
Sa desisyon kan Supreme Court En Banc, idineklarar na unconstitutional asin warang bisa an nagkapirang probisyon kan 2024 GAA asin an Finance Circular na naging basehan kan paglipat kan pondo, huli sa suboot grave abuse of discretion.
