LEGAZPI CITY – Pinaghahandaan na kan Daraga Municipal Disaster Risk Reduction and Management Office (MDRRMO) an posibilidad kan pag-ebakwar sa saindang mga residenteng nasa 7KM sagkod 8KM extended permanent danger zone enkaso maglala an sitwasyon kan Bulkang Mayon na presenteng nasa alert level 3 status.
Segun ki Daraga MDRRMO Head Engr. Bim Dineros sa intrevista kan Bombo Radyo Legazpi na tapos nang ma-identipikar kan Lokal na Gobierno an gabos na isasairarom sa pag-ebakwar kun sain kabale digdi an sagkod 9KM extended permanent danger zone.
Nakadesignar na man suboot an mga evacuation center na gagamiton kan kada Barangay kun sain na-identipikar na man kun arin sa mga ini an kaipuhan tugdukan nin paramientras na kitchen area, wash area asin comfort rooms.
Enkaso isakat sa alert level 4 an Bulkang Mayon, maabot sa labi 1,700 na pamilya o katampad nin poco mas o menos 6,000 na indibidwal an apektado asin kinakaipuhang i-ebakwar sa laog kan 7KM sagkod 9KM extended permanent danger zone.
Pigtaram pa kan opisyal na pira sa mga Barangay sa saindang banwaan na posibleng maapektaran iyo an Bañadero, Mi-isi, Salvacion, asin Budiao.
Magiging katabang suboot ninda an manlain-laing ahensya kan Gobierno sa pag-aasikaso kan mga kakaipuhanon kan mga idedeklarang Internally Displaced Person kun sain papangenotan kan Municipal Social Welfare and Development Office an pagkakan, Municipal Environment and Natural Resources Office para sa koleksyon kan basura, Municipal Health Office para sa health and sanitation, mantang Municipal Agriculture Office an para sa agriculture and veterinary concern.
Paglilinaw man ni Dineros na enkaso ipa-otob na an evacuation efforts, tatawan prayoridad sa pag-ebakwar an mga bados, senior citizen, person with disability, asin mga kaakian.
 is preparing for the possibility of evacuating their residents in the 7KM to 8KM extended permanent danger zone in case the situation of Volcano Mayon worsens which is currently at alert level 3 status.){kind=link}