Uminabot na sa P143 million an danyos sa imprastraktura makalihis an magkasunod na linog na nagyugo sa banwaan kan Manay, Davao Oriental kan Oktubre 10, segun sa National Disaster Risk Reduction and Management Council (NDRRMC).
Basado sa datos kan Office of Civil Defense (OCD) apektado an labi 1.4 milyong katawo sa rehiyon, kun saen 9 na an napabaretang nagadan asin 403 an irido.
Nairehistro man an 18,811 na harong an nadanyaran kun saen 17,622 digdi an partially damage asin 1,189 man an dagos nang nagaba huli kan makukusog na linog.
Katamod kaini nagtetenir man sa 12 evacuation centers an 771 na pamilya o katampad nin 2,613 katawo, mantang nagpapadagos an mga relief operations asin pagpapakarhay kan mga raot na agihan asin edipisyo.
Mientrastanto labi P1.183 million na tabang na an naibarewas para sa mga apektadong lugar, asin kasabay kaini an pagdedeklara nin state of calamity kan Caraga, Davao Oriental nganing maparikas an pagtatao nin ayuda.
.){kind=link}