LEGAZPI CITY – Ipigdoon kan Bureau of Fire Protection Legazpi an pagtatao nin dalan kan mga motorista sa mga nakakasabayang fire trucks sa kakalsadahan.
Ini an may kinaaraman sa pirang insidenteng naglalakop sa social media na kun sain dae pigpapa-agi kan pirang motor an mga behikulo kan mga bomberong maresponde sa mga kasulo.
Segun ki Legazpi City Fire Station Public Information Officer Senior Fire Officer 2 Norman Andes sa intrevista kan Bombo Radyo Legazpi na an mga siring kaining gawi an pwedesir matawan nin penalidad urog na kun nagtatanog an mga sirena kaini.
Dapat suboot na sanayon kan mga motorista na magpa-ubaya sa mga fire trucks asin ambulansya asin ibitaran an pagsunod sa likodan na parte kan behikulo nganing malikayan an anumang klase nin insidente.
Ipigpapasalamat man kan opisyal na wara pa sindang nakahampang na kaparehong insidente sa saindang pagresponde sa ciudad na pwedesir magkawsa nin dugang na epekto asin pagkawara nin buhay.
Pagirumdom ni Andes sa mga motorista na permihang magpa-ubaya sa mga fire trucks asin ambulansya nganing tulos sindang makapagtaong tabang sa mga nangangaipuhan.
Mientrastanto, ipighayag man ni Andes na uminabot sa 3 insidente nin kasulo sa ciudad kan Legazpi an saindang narespondehan sa enot na bulan kan taong 2026.
