LEGAZPI CITY — Naibarewas na ngunyan sa anom na provincia kan Bicol region an nasa P36 million kantidad nin hybrid palay, mais asin assorted vegetable seeds.
Segun ki Department of Agriculture Bicol spokesperson Emily Bordado sa intrevista kan Bombo Radyo Legazpi, ipinadara na sa provincial government kan Camarines Sur an nasa 14, 160 bags nin palay seeds na nakatalaan man na ipanao sa mga paraoma na pinaka naapektaran kan nagtalikod kan Tropical Depression Usman.
Dugang pa kaini na nasa 1,560 bags nin hybrid corn seeds asin 1,760 kilos man nin assorted vegetable seeds an ipinanao sa provincia kan Albay asin Masbate.
Afuera kaini, pigbuyagyag ni Bordado na naghagad pa an ahensya nin P560 million na dugang na pondo na pighahalat pang maaprubaran.
Gagamiton suboot ini sa pagbakal nin dugang pang mga pananom asin fertilizers siring man an pagpapakarahay kan mga nadanyaran na irigasyon.
Segun ki Bordado, an P23 million na parte kan dugang na pondo an ibabakal man nin mga hayop siring kan karabaw, baka, manok, urig, kanding asin bulong sa mga hayop na naka-eksperyensya nin stress durante kan panrarapado kan raot nin panahon.
An P10 million an nakatagama pa sa pagbakal nin assorted vegetables na liwat na ipapanao sa apektadong mga paraoma sa rehiyon.
