LEGAZPI CITY- Nagpaotob nin temporary total lockdown an regional office kan Civil Service Commission (CSC) sa Bicol makalihis na saro sa mga empleyado kaini an magpositibo sa COVID-19.
Nasa isolation facility naman ini mantang pigmo-monitor an kondisyon kan salud.
Segun ki CSC Bicol Regional Director Daisy Bragais sa intrevista kan Bombo Radyo Legazpi, kaipuhan an paramientras na pagsasarado ngania na matawanang-dalan an disinfection asin contact tracing.
Kan Sabado, Marso 6, isinairarom naman an gabos na empleyado sa swab testing mantang pighahalat pa an ibababang resulta kan City Health Office.
Inasegurar man ni Bragais na dai nagpupundo an serbisyo huli ta naka-work from home scheme na muna ang mga empleyado.
Para man sa mga may scheduled transactions sa oficina ngunyan na semana, mag-aabiso na sana an CSC Bicol kun nuarin an pag-resched sa mga ini.
Enot naman na nagbaba nin abiso si Mayor Noel Rosal dapit sa paglockdown kan nasabing oficina.
