LEGAZPI CITY- Prayoridad sa ngunyan kan gobyerno an pagdeliver kan ika-duwang batch kan nasa 400,000 na doses nin Sinovac vaccines sa mga lugar na halangkaw na naireport na kaso nin COVID 19.
Sa intrevista kan Bombo Radyo Legazpi kay Dr. Rita Mae Ang-Bon an Program Coordinator for COVID 19 Vaccine kan DOH Bicol, dae muna makakaresibe kan nasabing bakuna an rehiyong Bicol huli ta ipinadara na ini sa National Capital Region, Cebu, Cordillera asin iba pang lugar na nahilingan nin paglangkaw kan kaso kan virus.
Kaipohan suboot na enoton an nasabing mga lugar ngani na mapugolan na an pagdakol pa kan kaso lalo na an mga nadiskobreng bagong variants kan virus.
Mientras tanto, base sa datos kan DOH sa vaccination program sa Bicol, nasa 18,000 pa sanang mga health care workers an natawanan kan bakuna hali sa target na 70,000.
Huli digdi, paparikason pa kan ahensya an rollout kan bakuna oras na may mag-abot naman na COVID vaccine sa kataposan kan bulan o sa enot na semana kan Abril.
Preparado na sa ngunyan an mga vaccination sites kan haros gabos na mga local government units asin bakuna na sana an pighahalat.
