LEGAZPI CITY-Nagdemitir na si Rossana Fajardo bilang commissioner kan Independent Commission for Infrastructure (ICI), na magigin epektibo sa Disyembre 31, 2025.
Sa saiyang pahayag, dai niya binaggit an rason kan saiyang desisyon asin wara pang detalye kun sisay an temporamenteng mapalit sa saiyang pwesto.
Inapod niya an saiyang lakdang bilang sarong “courtesy resignation,” na karaniwang pigsasagibo ngani magtaong paagi sa sisay man na itatalaga kan may otoridad.
Kasunod ini kan pag-resign man ni dating Sec. Rogelio Singson, na saro sa commissioner kan ICI.
An ICI an binilog kan Setyembre 2025 ngani magsagibo nin pagbusisi sa mga darakulang proyekto sa imprastruktura, partikular sa kontrobersyal na flood control programs na kun imbuelto sa alegasyon kan korapsyon.
Huli sa magkakasunod-sunod na pagbubutas sa pwesto, mas ikinahandal an kapasidad kan komisyon na magtenir na matibay asin epektibo sa pagbabantay kan mga proyekto kan gobierno.
An masunod na lakdang kan komisyon sa pagtatalaga kan kapalit sa posisyon an magigin kritikal suboot sa pagmamantenir kan kredibilidad kan ICI.
