LEGAZPI CITY – Dagos-dagos an pagbusol kan Commission on Elections (COMELEC) sa pagbabawal sa paggamit kan artificial intelligence asin deepfake techonology sa mga campaign material sa 2025 elections.
Sa intrevista kan Bombo Radyo Legazpi ki Commission on Elections spokesperson Atty. John Rex Laudiangco, ginibo an nasabing lakdang ngani na maibitaran an seryosong epekto sa eleksyon.
Posible kaya ining gamiton kan mga madalagan sa eleksyon na panraraot, pagpapalakop nin fake news asin iba pa sa mga kalabang kandidato.
Magin mismong sa ahensya an powede man na gamiton bilang nagpapalakop nin salang impormasyon.
Dugang pa kan opisyal na nagkapirang lider na man kan estado an nagin biktima kan mga manipuladong ladawan o audio kaibanan na si Presidente Ferdinand Marcos Jr.
Katabang kan ahensya sa pag-take down kan mga nagagamit nin artificial intelligence asin deepfake techonology an manlain-lain na social media platform siring kan Meta asin Youtube.
Sa paagi kaini, marikas na mabisto asin madakop an mga nasa likod kan nasabing mga panloloko.
