LEGAZPI CITY- Sinierto kan Commission on Elections Bicol na nagpapadagos an saindang preparasyon para sa mga kinakaipuhan para sa nagdadangadang na 2025 elections.
Ini an huli ta nagkapirang bulan na sana antes an pirilian alagad igwang mga programa an paramientras na naatrasado huli sa nagkapirang mga isyu.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na target ninda na matapos an gabos na mga preparasyon antes an Mayo 12, na mismong aldaw kan pirilian.
Marurumduman na enot ng natapos ang roadshow kan mga automated election machines sa rehiyon.
Segun sa opisyal na sinikap kan saindang mga election officers na madumanan an mga hararayong lugar ngani na maipahiling an mga features kan nasabing makina na gagamiton sa pirilian.
Obheto kaini na magin pamilyar an mga botante sa paggamit kan automated election machines ngani na dae na madifisilan pa sa mismong aldaw kan pirilian.
