Nagtutubod si House Deputy Speaker Janette Garin na posibleng labi sa kabanga kan mga miyembro kan Kamara de Representantes an maboto nin pabor sa impeachment ni Vice President Sara Duterte.
Segun sa kongresista na kun mangyayari ini, malagpas sa kinakaipuhan na 106 na boto kan Kamara ngani na maipasa an impeachment complaint sa Senado para sa paglilitis.
Dagdag pa kaini na sa irarom kan Lakas-CMD, igwang labi sa 80 miyembro na ini sa Kamara, posibleng 2/3 an magsuporta sa impeachment base sa ebidensyang ipiglatag sa pagdangog.
Sa ibong kaini, tinawan duon kan lehislador na igwa man liwat na nagkapirang mga kongresista an posibleng maimpluwensyahan nin politika asin sitwasyon kan saindang distrito urog na sa Mindanao.
Punto pa ni Garin na warang magigin sarong party stand an Lakas-CMD asin papabayaan an mga miyembro kaini na bumoto basado sa saindang konsensya.
