LEGAZPI CITY- Kinontra kan Commission on Elections (COMELEC) Bicol an mga nagpoproponir na ikaag an bilog na rehiyon sa irarom kan Ley Martial kasunod kan panggagadan ki Ako Bicol Party-list Representative Rodel Batocabe asin police escort kaini na si SPO1 Orlando Diaz siring man an iba pang nairerehistrong kariribukan.
Sa intrevista kan Bombo Radyo Legazpi ki Regional Elections Supervisor Atty. Maria Juana Valeza, dae pa suboot bastante an mga pighihiling na rason para sa nasabing lakdang.
Tinawang-duon pa kan opisyal na bako madali an sasaparon an economic impact na sasaparon kan lugar kun en caso.
Sa ibong kaini, uyon man an opisyal sa rekomendasyon ni Presidente Rodrigo Duterte na ipasairarom sa kontrol kan COMELEC an banwaan kan Daraga kun sain nagdadalagan sa pagka-mayor an ginadan na kongresista.
Sa ngonian, naghahalat na sana suboot an opisyal kan pagkokonsiderar kan consolidated reports mantang posibleng magkaigwa na nin session sa masunod na semana.
Piglalaoman na maipapaotob an nasabing lakdang makalihis an bagong taon na ipapaagi muna sa session sa en banc.
Enot naman na ipighayag kan COMELEC na pigkokonsiderar na an pagkakaag sa Daraga, Albay sa irarom kan kontrol kan ahensya.
