LEGAZPI CITY- Suportado kan Commission on Elections Bicol an pigbubusol kan komisyon na pagbabawal sa paggamit kan Artificial intelligence asin deepfake katakod kan paparaning 2025 midterm elections.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na maka alarma an paggamit kan Artificial intelligence huli sa posibilidad na paglakop nin mga disinformation asin fake news.
Paliwanag kan opisyal na posibleng mabiktima kan salang mga impormasyon an mga botante na dae tataong maghiling kan tunay na impormasyon sa bako.
Partikular na tinukoy kan opisyal an publiko na madaling magdubod sa mga nahihiling kaini urog na sa social media.
Dugang pa ni Valeza na solamenteng an mga poderosong politiko sana an makikinabang sa Artificial intelligence asin deepfake huli ta sinda an may kakayanan na magbayad nin matitibay na Information technology experts.
Pigkakahadit pa kan opisyal na magamit man ini sa panraraot sa saindang mga kalaban sa pirilian.
Huli digdi, sinabi kan ahensya na kinakaipuhan na magdangog kan kongreso sa saindang pangapudan ngani na maibitaran an mas malalang problema.
Mientras tanto, sinierto man ni Valeza na padagos na nagsasabay an ahensya sa mga pagbabago sa teknolohiya asin presenteng panahon ngani na magin pro-active sa mga nangyayari sa nacion.
