LEGAZPI CITY—Pighayag kan Commission on Elections Bicol na dae sinda maimplementar nin 4-day work week huli sa nagpapadagos na pagpaparehistro asin preparasyon para sa Barangay and Sangguniang Kabataan (SK) Elections magin an eleksyon para sa Bangsamoro Autonomous Region in Muslim Mindanao (BARMM).
Segun ki COMELEC Bicol Regional Director Atty. Jane Valeza, sa intrevista kan Bombo Radyo Legazpi, igwa sinda nin mga aktibidades na dai pwedesir mahiro an deadline kaya kaipuhan na tapuson an mga ini sa tamang oras.
Afuera digdi, puspusan man an saindang pagpasiring sa mga barangay, pagpreparar sa pagkundusir nin election and registration board para sa maabot na bulan nin Abril, inspeksyon sa mga voting centers, pigtutukan man ninda an technicality issues siring kan pagsasaayos kan saindang database.
Dugang niya na nagsagibo na man sinda nin nagkapirang lakdang nganing makatipid sa paggamit kan enerhiya siring kan pagpalsok kan kuryente urog na kun wara man masyadong piggigibo asin minimal na paggamit kan air conditioner sa opisina.
Pig-engganyar man kan opisyal an publiko urog na an ma-adopt kan 4-day work week na mga empleyado na kuwaon ining oportunidad na magpasiring sa saindang opisina nganing magparehistro asin dae na makipagsiksikan sa huring aldaw kan pagpaparehistro sa Mayo 20, 2026.
