LEGAZPI CITY-Kinondena ni Defense Secretary Gilberto Teodoro Jr. an China Daily makalihis ining magpaluwas nin sarong social media post na naglaladawan sa mga Pilipino bilang mga unggoy katakod kan orolay sa arbitral ruling sa West Philippine Sea (WPS).
Segun kay Teodoro, an nasabing post kan Chinese state media outlet, nagpapahiling suboot nin pananaw kan Chinese Communist Party (CCP) sa mga Pilipino.
Ipinaluwas an kontrobersyal na post kan China Daily kan Hulyo 10, duwang aldaw bago an ika-10 anibersaryo kan makasaysayang desisyon kan Permanent Court of Arbitration na nagbisto sa direchos kan Pilipinas sa Exclusive Economic Zone (EEZ) kaini sa WPS.
Sa ipinaluwas na pahayag kaini kan Huwebes, sinabi ni Teodoro na an pagpapahiling sa mga Pilipino bilang unggoy, sarong anyo nin pangmamaliit asin propaganda laban sa nacion.
Mahihiling kaya sa nasabing video an sarong unggoy na nakasulot nin barong Tagalog asin salakot mantang gari pigsusugo kan mga karakter na kumakatawan sa mga Amerikano asin Hapones.
Ipinahiling man sa video an unggoy na pigbobomba kan water cannon sa kadagatan makalihis maresibe an kopya kan arbitral award.
Segun kay Teodoro, an nasabing materyal, sarong pangungutya sa 2016 Arbitral Award asin nagpapahiling suboot nin kadahasan laban sa mga Pilipino asin militar.
Inapod man ini kan kalihim na “contemptible propaganda” asin nanindugan na nagpapahiling ini nin kawaran nin kakayahan kan China na ipaglaban an saindang mga pahayag sa WPS sa paago kan makatuwirang argumento.
Mientras tanto, nagpaluwas man nin pahayag si Rear Admiral Jay Tarriela, tagapagtaram kan Philippine Coast Guard para sa West Philippine Sea concerns, kun sain kinondena niya ag anumang klase kan racism.
