LEGAZPI CITY—Sa botong walo (8), ideneklara kan Sangguniang Panlalawigan kan Catanduanes na Persona Non Grata si Governor Partrick Azanza makalihis an pirang isyu sa pagultangan kan ehekutibo asin lehislatura kan provincia.
Segun ki Sangguniang Panlalawigan ng Catanduanes Board Member Edwin Tanael, sa intrevista kan Bombo Radyo Legazpi, nagpuon ini sa mga pahayag kan gobernador sa Sangguniang Panlalawigan, kun sain wara suboot ining tiwala sa trabaho ninda urog na kan nakaaging bagyong Uwan kun sain digdi nagkaigwa suboot nin deperensya asin digdi ninda nahiling an tunay na pagkatawo kan gobernador.
Pighayag ni Tanaelna enot na digdi an habo kan gobernador na magdeklara nin state of calamity an Sangguniang Panlalawigan, nagsunod an paghagad kan gobernador nin release kan Quick Response Fund (QRF) kun saen an calamity assistance na saiyang ipigbase an hale sa nasyunal an dae sinda makapagheras nin QRF sa lokal kun kaya nagdeklarar an Sagguniang Panlalawigan nin first-locally na ibugtak an isla provincia sa state of calamity.
Alagad segun saiya na naoctaba an deklarasyon huli sa pighahalat ninda an desisyon kan gobernador na kun sain enot nang nakapagdistribuir na nin materyales sa mga apektadong residentes—kun kaya napagdesisyunan kan Sanggunian Panlalawigan na iheras ini sa paagi kan cash asssistance.
Habo suboot kan gobernador nin cash assistance asin digdi na ini inapod kan opisyal an Sangguniang Panlalawigan na mga ‘ilegal,’ ‘mga trapo’, mga ‘corrupt’ asin ‘warang nagiginibohan’ sa probinsya.
Makalihis an pirang diskusyon an nagdesisyon sinda na ideklara an gobernador na Persona Non Grata na boot sabihon magigin limitado an pakikipagkoordinar saiya, alagad dae man mawawara an mga transaksyon na mandated en kaso may tiwala an opisyal sa Sangguniang Panlalawigan.
Mensahe ni Tanael sa gobernador na magkaigwa ini nin tiwala sa Sangguninan Panlalawigan asin ipigdoon na bako sinda kaiwal kan opisyal.
Mientrastanto, sa intrevista kan Bombo Radyo Legazpi ki Catanduanes Governor Patrick Alain Azanza, ipighayag kaini na warang rason ngani i-Persona Non Grata siya sa Sangguniang Panlalawigan huli sa wara man siyang piggibong maraot asin pigsunod niya sana kun ano an nasa ley kan nacion.
Segun saiya na makalihis an pangrarapado kan bagyong Uwan an tulos na nagrani sa Sangguniang Panlalawigan para sa pagtugot nin paggamit kan Quick Response Fund (QRF), alagad dae suboot tulos ini naaksyunan kan Sangguniang Panlalawigan.
Dugang niya na imbes na sunudon an rekomendasyon kan Provincial Disaster Risk Reduction Management Council mapadapit sa Quick Response Fund an ibinago suboot ini sa paagi kan pagbarewas nin kwarta.
Tinawan-doon ni Azanza na dae pwedesir na i-revise, i-modify kun ano an inirekomenda kan PDRRMC.
Pinaliwanag kaini na warang nakabugtak na cash assistance sa Annual Investment Program—kun saen yaon digdi nakabugtak kun papano gagamiton an QRF.
Alagad nagkaigwa nin conflicting sa mga isinumiter na resolusyon kan Sangguniang Panlalawigan enot na digdi an wara suboot na cash assistance sa distribusyon, alagad sa ikasunod na resolusyon sa parehong aldaw kan December 1, an nagsumiter liwat sinda nin resolusyon mapadapit sa sarong ordinansa na magbabarewas nin cash assistance na boot sabihon warang back up.
An ikaduwang resolusyon o ordinansa an na-veto kan gobernador huli sa wara ining cash back up asin nagbabalgar sa ley alagad in-override ini kan Sangguniang Panlalawigan asin ipigpipiritan na kwarta an saindang ibabarewas.
Pighayag kan opisyal na wara siyang piggibong maraot asin saro siyang anti-corruption asin mawot niya an good governance, transparency, may integridad asin paninimbagan sa saiyang paggobyerno sa isla provincia kan Catanduanes.
© Photo: Radyo Pilipinas Virac, Catanduanes
