LEGAZPI CITY- Pinahimutikan ni Catanduanes Governor Joseph Cua na igwa sya nin kinaaraman o partisipasyon sa nadiskubreng mega shabu laboratory sa Palta Small, Virac sa parehong probinsya.
Katakod ini kan isinangat na reklamo sa Office of the Ombudsman ni Edralyn Pangilinan, esposa kan binadil-gadan na negosyante asin taga-media na si Larry Que.
Magigirumduman na ginadan si Que kan dae pa nabibistong mga suspetsado kun sain pigtutubudan na motibo an column na saiyang isinurat sa dyaryo na nagtutukdo ki Cua asin Virac Mayor Samuel Laynes na igwa nin kinaaraman sa laboratoryo.
Sinabi ni Cua na purong pulitika an nahihiling nyang rason sa pagsangat nin reklamo sa Ombudsman kontra saiya.
Dugang pa kaini, kaibanan ni Pangilinan an pitong lokal na taga-media kan magsangat nin reklamo.
Base sa pahayag kan esposa ni Que, nagpalyar an duwang opisyal sa saindang mga obligasyon kun kaya pigbabasol sa konstruksyon kan nasambitan na shabu lab.
Mientrastanto, namalisyahan man suboot ni Cua an garo planadong pagbalangibog nin salang impormasyon sa social media na nagsasabing dae sya nag-atindir sa ipinaapod na meeting ni Presidente Rodridgo Duterte sa Malacañang ngani na tukaron an dapit sa iligal na droga.
Bilang ebidensya kan saiyang presensya sa meeting, pinost kan gobernador sa saiya man na social media account an saiyang certificate of appearance gikan sa Palasyo.
