Nakaresibe nin dugang na P20 million hali sa Office of the President si Pinoy gymnast Carlos Yulo makalihis manggana nin duwang bulawan na medalya sa Paris Olympics.
Ipigsagibo an pagtatao nin cash incentives sa Malacañang Palace makalihis an pag-abot kan mga atletang Pinoy na suminabak sa Paris Olympics.
Segun ki Presidente Ferdinand Marcos Jr. na tinapatan sana kaini an insentibo na nakalaag sa Republic Act 10699 o the National Athletes, Coaches, and Trainers Benefits and Incentives Act.
Marurumduman na sa irarom kan ley, an siisay man na atleta na makakakuwa nin bulawan na medalya sa Olympics an makakaresibe nin P10 milyon.
Huli ta duwang gold medal an nakuwa ni Yulo, igwa ining mareresibe na P20 million.
Tinawan man ni Presidente Marcos si Yulo nin Medal of Merit na ipigtatao sa mga indibidwal na nakakuwa nin pagbisto sa international events sa lado kan literature, sciences, arts, entertainment asin sports.
Matatawan man nin dugang na P2 million an mga bronze medalist na mga boksingero na sinda Nesthy Petecio asin Aira Villegas kun sain tinapatan man kan hepe ehekutino an nakalaag sa ley na P2M.
Magin an mga dae nakakuwa nin medalya an tatawan man nin insentibo na tig-P1 million asin P500,000 sa mga coaches.
Natawan man nin pagbisto an gabos na mga atleya kun sain binisto kan presidente an sakripisyo kan mga ini na makapag partisipar sa mga international sporting events.
