LEGAZPI CITY – Piglalaomang maipapaluwas na sa enot na quarter kan taong 2020 an bagong P20 coin na ipiglunsar kasuodma kan main office kan Bangko Sentral ng Pilipinas (BSP).
Sa intrevista kan Bombo Radyo Legazpi ki BSP Legazpi Branch Bank Officer Sharon Moyano, bi-color an nasabing sencillo na may pagka-orangy an color.
Magtetenir an pandok ni dating President Manuel Quezon sa hampang na porsyon kan P20-coin mantang burak na nilad an nasa likod na nagsisimbolo sa pinagkuwaan kan pangaran na Manila.
Afuera sa nasabing barya, niluwas naman an bagong disenyo kan P5-coin na kolor silver man giraray alagad korteng nonagon na o may 9 sides.
Sa ibong kaini, klinarificar man kan BSP na magtetenir sa sirkulasyon an mga banknote currencies kan P20 o an mga papel na kwarta sa nasabing denominasyon.
Paluway-luway na sana suboot ining mawawara kun ipundo naman an paggibo kan mga nasabing bills.
