LEGAZPI CITY—Nangapudan an opisyales kan Barangay Bigaa, Legazpi City sa lokal na gobiero kan ciudad asin Department of Public Works and Highways na matabangan sinda sa pagmando kan trapiko huli sa nagpapadagos na road construction sa lugar.
Segun ki Kagawad Jocelyn Azagra kan nasambitang Barangay sa intrevista kan Bombo Radyo Legazpi, dakula an nagigin abala kan road construction urog na sa mga estudyante na nagco-commute na pig-aabot nin haros sarong oras sa lugar asin abala suboot ini sa mga iba pang emerhensya.
Dugang niya na proyekto kan national government an tinampo, asin dae man nakakakaaram an saindang barangay kun nuarin mapuon o matapos an nasabing proyekto.
Mantang nagdedesignar man an saindang opisina nin mga barangay tanod sa lugar nganing makapagtao nin asistensya sa mga motorista, alagad pighayag kan opisyal na dae ninda matutukan ini sa bilog na oras huli sa diit an personahes asin may duty an mga ini kada banggi.
Sinabi man ni Azagra na mas magayon na ibugtak sa lugar an personahes kan kapulisan o public safety office huli sa minsan an dae pigtutubudan an saindang mga barangay tanod kan mga motorista.
Naghihingoa man an opisyal na matapos na an piggigibong tinampo bago pa man an pag-obserbar kan Semana Santa huli sa dakula an nagin abala kaini sa publiko.
