LEGAZPI CITY-–Nagpepreparar na ngunyan an Barangay Anoling sa banwaan kan Camalig, Albay sa mga posibleng epekto kan pigbabantayang raot nin panahon sa nacion na bagyong Ada.
Segun ki Brgy. Anoling Punong Barangay Mia Alemania, sa intrevista kan Bombo Radyo Legazpi, saro sa saindang pigprepararan an huma kan lahar flow gikan sa bulkang Mayon huli sa sakop an lugar kan 6 kilometer radius permanent danger zone kan bulkan.
Sa presente, nakapag-ebakwar na man an gabos na mga apektadong residentes huli sa aktibidad kan bulkan asin natawan na nin magkakanigong asistensya gikan sa gobierno.
Pagiromdom man ni Alemania sa mga residentes kan saindang barangay na mag-andam sa mga announcements kan saindang opisina, siring man na pig-asigurar kaini na yaon sinda nganing magtaong giya sa kun ano man an ipigpapaluwas a impormasyon gika sa lokal na gobierno mapadapit sa mga impormasyon kan saindang presenteng sitwasyon.
Mientrastanto, nasa 123 pamilya na an nag-ebakwar sa nasabing barangay huli sa nagpapadagos na aktibidad kan bulkang Mayon.
