LEGAZPI CITY- Hindi lamang isa kundi dalawang pagsusulit ang pinangunahan ng Bicolana na si Querubin Gapas, tubong Sorsogon matapos na mamayagpag sa Top 10 ng October 2019 Chemist and Chemical Technician Licensure Exams.
Nakuha ni Querubin ang ikawalong pwesto sa 2019 Chemical Technician Licensure Examination sa rating na 89.50% habang Top 7 rin sa Chemist Licensure Exam sa 88.20% rating.
Sa ekslusibong panayam ng Bombo Radyo Legazpi kay Querubin na magmula pa umano ng pumasok sa Bicol University, target nang makasama sa topnotchers ng licensure exam upang mabigyan ng karangalan ang pamilya.
Nabatid na mula ito sa karaniwang pamilya, kung saan nagtatrabaho bilang driver at minsan ay umi-extra bilang laborer ang kaniyang ama habang simpleng maybahay ang ina.
Sa kanila nito, iginiit ni Querubin na hindi dahilan ang paghihirap upang magtagumpay sa buhay at mabigyan ng magandang kinabukasan ang sarili.
Hindi naman nito nakaligtaang pasalamatan ang mga nasa likod at inspirasyon ng tagumpay.
Sa ngayon, naghahanap pa ng trabaho si Querubin sa Laguna habang tiniyak ang pag-uwi sa Bicol upang maipagdiwang ang tagumpay kasama ang mga mahal sa buhay.
