LEGAZPI CITY – Nagbilog na nin Special Investigation Team (SIT) “Bercasio” an Police Regional Office 5 sa pag-iimbestigar sa pambabadil-gadan sa independent announcer commentator kan sarong online news portal sa ciudad kan Sorsogon.
Nangyari an insidente pasado alas-7:55 kasubanggi kontra sa dating radio reporter na si Jobert ‘Polpog’ Bercasio, 39-anyos na residente kan Purok 3, Sitio Dancalan, Brgy. Buenavista, Bacon District.
Kinondenar man kan Bicol PNP an brutal na panggagadan ki Bercasio mantang promesa an hirarom na imbestigasyon tangarig na maaprehender an mga responsable sa krimen asin maitulod an hustisya sa nawalat na pamilya na kaini.
Susog sa inisyal na imbestigasyon, lunad an biktima kan scooter hali sa Sorsogon proper kan abangan kan mga suspek.
Apat na beses na pinagbabadil si Bercasio na nagsapar nin tama sa manlain-lain na parte kan lawas asin nagresulta sa tulos na pagkagadan.
Marikas man na nagdulag an mga dai pa nabibistong suspek.
