Nanindugan an Bureau of Fisheries and Aquatic Resources (BFAR) na dagos man liwat an operasyon asin pagsisira kan mga Pilipinong parasisira sa tahaw kan oil crisis.
Ini na kontraryo sa report kan sarong organisasyon na nagtaram na haros kabanga na kan mga parasisirang Pinoy an nagpundo na huli sa halangkaw na presyo kan langis.
Igwang hasta sa 2.5 million na na mga fisherfolks sa Pilipinas kun sain kadaklan sainda an naka focus sa capture fisheries.
Segun ki BFAR Spokesperson Director Nazario Briguera, posibleng anecdotal sana o warang marhay na katotoohan an nasabing report urog pang dati na man na igwang financial asin livelihood program an gobierno antes pa man magpuon an krisis.
An nasabing programa an suway pa suboot sa fuel subsidy na direktang kasimbagan sa presenteng fuel crisis.
Sa ibong kaini, aminado man an BFAR official na sa presente wara pang pormal na datos na nagpapahiling kun gurano kadakol an mga parasisira na nagpundo na sa saindang hanapbuhay huli sa krisis.
Segun ki Briguera na dae pa nagsasagibo an ahensya nin formal survey dapit sa nasabing isyu.
