LEGAZPI CITY- Na-obserbaran ngunyan an paglagkaw kan dakop nin tamban partikular sa fish landing sa banwaan kan Bulan, Sorsogon.
Ini an kasunod kan mga reports na ipigtatapok na sana kan nagkapirang parasisira an saindang dakop huli ta dae man naipapabakal.
Segun ki Bureau of Fisheries and Aquatic Resources (BFAR) Bicol Director Ariel Pioquinto sa intrevista kan Bombo Radyo Legazpi na tuyong siring na panahon, nagkakaigwa nin over supply kan nasabing klase nin sira asin dae man nakukuwa gabos kan mga canneries na nagigibo nin sardinas.
Aminado an opisyal na mas mahal pa an gastos kan mga parasisira sa fishing ground ngunyan na halangkaw an presyo kan langis kaya haros wara man na ganansya sa pagpapabakal kan tamban.
Mas madali man suboot ining maraot urog pa kun dae man nagagamit nin yelo an mga parasisira asin harayo an pagdadarahan.
Sa presente, sinabi ni Pioquinto na naghahanap nin paagi an ahensya ngani na mailaag ini sa ibang outlet o ma-ibiyahe sa mga lugar na diit an dakop.
Saro pa sa mga nahihiling na solusyon iyo an pagtatao kan ahensya nin magagamit na yelo ngani na mas mapalawig pa an preservation kan nasabing mga sira.
