LEGAZPI CITY — Klinaro ni Father Rex Arjona, director kan Social Action Center kan Archdiocese of Legazpi na talagang saro sa mga rekisitos sa pagpapakasal an kumpil.
Ini makalihis na magdulok sa Bombo Radyo Legazpi an sarong ina na pig-aagrangay an dae pagkumpil kan padi sa saiyang aki na ikinasal sa Barangay Pantao, banwaan kan Libon.
Reklamo kaini, pinabayad suboot sinda para sa pagsasagibo kan nasambitan na sakramento alagad dae man isinagibo kan nag-officiate na padi an seremonya.
Sinabi ni Father Arjona na igwa na nin kakayanan an sarong parish priest na magkumpil kan mga ikakasal urog pa na ipigkokonsidirar ining rekisitos kan Simbahan.
Sigon pa sa padi, mawot nindang halion an napagtuudan nang paghagad nin bayad para sa pagkumpil asin iba pang Sakramento huli ta nadidipisilan suboot an mga pobre na makapag-avaail kan mga serbisyo kan Simbahan.
Mientrastanto, saro pa sa pig-aagrangay kan nagreklamong ina an suboot halangkaw na bayad para sa kada pades kan ninong asin ninang sa kasal sa nasambitan na lugar.
Sienerto man ni Father Arjona na saiyang ibeberipika an nasabing impormasyon.
