LEGAZPI CITY- Mahigot an pagpapaotob kan Barangay Lapu- Lapu sa ciudad kan Legazpi sa pagpapaotob kan Smoke free ordinance.
Segun ki Kapitan Ma. Karren Canon- Valdez sa intrevista kan Bombo Radyo Legazpi na nakipag koordinar an saindang lado sa Smoke Free Unit kan Legazpi ngani na ma-deputize sinda kaya pwedesir na makapag issue nin citation ticket sa mga violators.
Nagpuon suboot sa information dissemination an saindang mga lakdang ngani na maipaliwanag sa mga residente kun nata ta ipinagbabawal an paninigarilyo sa mga pampublikong lugar.
Ini kaya an pighihiling na dakulang impact sa salud kan mga kaakian asin kan mga senior citizen kun nakakalanghap nin aso nin sigarilyo.
Magin an mga tindahan na nasa 100 meters an distansya sa mga eskwelahan an pigpagirumduman man dapit sa pagbabawal sa pagpapabakal nin sigarilyo.
Aminado man an opisyal na igwang mga residente na nadadagit sa implementasyon alagad kinakaipuhan na maipasabot na para ini sa pagprotehir sa salud kan publiko.
Basado sa datos, igwa na nin walong mga nasampulan asin natiketan.
Apat sa mga violators an nag-settle na asin apat an dae nag-asikaso kan bayolaston kaya pighahanda na suboot an demand letter huli ta posibleng makasuhan an mga ini nin administrative case.
Sinabi man ni Valdez na political will sana an kinakaipuhan ngani na magibong ma-implementar an mga eksistidong ordinansa sa ciudad.
