LEGAZPI CITY- Bagsak sa karsel an sarong barangay Kagawadna miyembro kan rebeldeng New People’s Army makalihis na makuwaan nin badil asin pampasabog sa ikinasar na search warrant operation kan PNP sa P2, Barangay 1, Pioduran, Albay.
Binisto an suspek na si Elwin Mangampo Buendia, 42 anyos na residente kan nasabing barangay.
Sa intrevista kan Bombo Radyo Legazpi kay Pol. Lt. Karen Formales an tagapagtaram kan Albay Police Provincial Office, nakaresibe nin impormasyon an PNP manungod sa koneksyon kan suspek sa mga rebelde kung kaya nagsagibo nin imbestigasyon hasta sa makapagpaluwas nin search warrant an korte.
Sa nasabing operasyon nakua hali sa harong kan kagawad an sarong cal. 45 pisto, duwang magazine na may mga bala, sarong granada, sarong anti-personnel mine asin mga sobersibong dokumentos.
Tulos na ikinarsel an suspek na nahahampang sa kasong pagbayolar sa Acta Republika numerado 10591 o an Comprehensive Firearms and Ammunition Regulation Act asin RA 9516.
Inasegurar ma kan PNP na lehitimo an nasabing operasyon huli ta presente man an gabos na mga kaipohang witness maging an suspek kan makua an mga armas.
