Legazpi City – Nanindugan an grupong Bantay Bigas na dae dapat pigseselebrar an World Food Day sa nasyon.
Segun ki Cathy Estavillo an tagapagtaram kan grupong Bantay Bigas sa intrevista kan Bombo Radyo Legazpi na wara man silbi an pagselebrar nin huli ta dakol man gilayun suboot an nakakamati nin kagutuman nin huli sa halangkaw na presyo kan mga bakalon asin dae pag aksyon kan presenteng administrasyon.
Pigsabi man kaini na wara man gilayun na nangyayari sa pigpromesa na 20 pesos na bagas ni bbm siring man kabaligtaran suboot an nangyayari nin huli ta pig-aasa an kakulangan sa mga pagkaon sa pag import partikular na an mga bagas.
Pigtawan doon pa kaini na dae man nakakatabang an pag import kan administrasyon nin huli ta dae man gilayun nagbababa an mga presyo kan mga bakalon asin naglalangkaw man an involuntary hunger rate kan mga nakaaging bulan nin huli ta dae pigkakaya kan publiko an mga presyo kan mga pangunahing bakalon siring kan sa bagas nin huli ta pigbabarat an mga paraooma pagbakal sa mga paroy.
Segun pa kay Estavillo na para saiya band aid sulusyon an kadiwa asin rice for all program kan administrasyon sa mga napapanahong issue ngunyan nin huli ta grabe an sakripisyo kan tawo nganing makabakal sana kan 29 pesos per kilo asin limitado sana man.
Kun talagang seryoso ini na mapababa an presyo kan mga bagas , mas maray suboot na darahon sa mga pampublikong merkado an mga bagas na pigdadara sa kadiwa nganing dakol an makabakal.
Rekomendasyon kaini na punduhon an mga band aid sulusyon asin dae paggamiton sa pulitika an utang na loob kan mga publiko asin dapat suboot na pagtuonan nin pansin an pagpapakusog kan lokal na produksyon nganing mapamaray an presyo kan bagas sa merkado.
