LEGAZPI CITY – Piglunsar kan toxic watchdog group na Ban Toxic an saindang “iwas paputok” campaign kasabay kan Human Rights Day.
Segun kay BAN Toxics Campaigner Thony Dizon sa intrevista kan Bombo Radyo Legazpi na nagin matrayumpo an pagpopoon kan saindang kampanya nin huli ta pigbalehan ini kan labi 2,000 na mga jovenes na gikan sa Payatas Elementary School.
Obheto kan saindang kampanya na matawan nin kaaraman an mga joven nganing mabawasan an bilang kan mga nalulugadan nin huli sa paggamit nin mga ipinagbabawal na mga paputok kada masapit an pasko asin bagong taon.
Pigpili ninda na gibuhon nin amay an saindang kampanya nin huli ta talamak an nalulugadan nin huli ta nagpeak kan nakaaging taon an mga casualty na kawsa kan paputok sa enterong nasyon, naputukan man o naka-alon ki pulbura.
Pigtawan doon ni Dizon na nagdakol man an bilang kan mga nalugadan na kawsa kan paputok kompara kan taong 2020 nin huli ta nagnormalize an sitwasyon poon kan maghiwas an mga restriction na ipigbugtak kan tuminama an covid-19 pandemic sa nasyon.
Base man sa saindang piggibong monitoring na bago pa man magtapos an bulan kan nobyembre, nakakahiling na sinda nin mga tindahan na nagpapabakal nin mga pailaw asin ilegal na paputok.
Plano man kan grupo na ipadagos an pagsagibo nin mga aktibidad sa mga komunidad sa mga nagkapirang lugar sa nasyon asin enganyaron an mga animal lovers manungod sa epekto kan ilegal na paputok sa salud kan saindang mga atamang hayop.
Pangapodan ni Dizon sa mga ahensya kan gobyerno na magsagibo na an mga ini nin magkakanigong aksyon nganing masawata an paggamit kan ilegal na paputok asin sabaton an taong 2025 nin warang naitatalang fire cracker related incident sa nasyon.
