LEGAZPI CITY- Naglalaom an Philippine Red Cross (PRC) na mas dakol na an maisasairarom sa COVID test asin makukumpirmar kung positibo o dae sa nakakaolakit na virus sa pagpupuon na kan paggamit nin saliva test sa nasyun.
Sa intrevista kan Bombo Radyo Legazpi kay Philippine Red Cross Camarines Sur Chapter Officer-in-Charge Clamrence Abada, mas marikas ng makakapagpatest an mga Pilipino huli ta abilable ini sa gabos na 103 na chapters nin Red Cross sa manlain-lain na parte kan nasyun.
Sa mga mawot na magsairarom sa saliva test, kaipohan sana na mag-aaply online asin mag-fill up sa form kan PRC.
Saka tatawanan nin schedule kung nuarin kaipohan na magpasiring sa clinic kan PRC ngani na kuwaan nin saliva na ipapadara man pasiring sa molecular laboratory sa Batangas para sa test.
Segun kay Abada, huli ta kaipohan pang darahon an samples pasiring sa Batangas, maabot nin nasa 12 oras ngani na maisagibo an test asin makua an resulta na ipapadara man sa e-mail kan nagpatest.
Magkakaigwa nin koordinasyon an PRC sa Department of Health asin Local government units kung sain tulos na ipapaaram sa mga otoridad kung positibo an resulta ngani na marikas na maisairarom sa quarantine pasyente asin makapaglunsar nin contact tracing.
