LEGAZPI CITY — Nakadepende sa miyembro kan Barangay Drug Abuse Council (BADAC) kun nuarin sinda mapadeklarar na klarado na sa droga.
Segun ki PSupt. Nilo Berdin, hepe kan Legazpi City Police, padagos an saindang pakikipag-koordinar sa gabos na barangay sa syudad kan Legazpi partikular na sa 16 na barangay na apektadong marhay kan iligal na droga.
An limang naenot nang naideklarar na drug-cleared dae man kasabay sa 16 na nasa listahan kan Philippine Drug Enforcement Agency (PDEA) asin nagkapira man sa numerong ini an nasa proseso na kan deklarasyon.
Segun ki Berdin, maski na mawot na nindang malibre an syudad sa droga, kaipuhan na mutual o pareho an desisyon kan opisyal kan barangay sa gigibuhong deklarasyon.
Alagad sinabi kan opisyal na kaipuhan man na magluway-luway nang magsunod o mag-comply sa itinaong 14 parameters ngani na magin drug-cleared na an lugar.
Kaipuhan man suboot na rumdumon kan mga barangay officials na hale mismo an direktiba ki Pres. Rodrigo Duterte kun kaya kaipuhan nindang gibuhon an sinumpaang obligasyon na hinguwahon na maprotehiran an karahayan kan kadaklan.
Kun dae man magsunod, sinabi ni Berdin na daeng rason an mga ini na magtukaw sa ano man na pwesto sa barangay, pwedesir man na isipon na pabaya sa trabaho o posibleng protektor kan iligal na droga.
