Sinimbag ni Atty. Levito Baligod an rebelasyon ni Ombudsman Jesus Crispin ‘Boying’ Remulla manungod sa suboot ‘delivery’ nin mga maleta na nagpoon antes pa an presenteng administrasyon.
Sa online post kan abogado, sinabi kaini na garing inamin kan opisyal an mga account kan mga dating soldados.
Alagad kumento niya na kinuluyan kan politika ni Ombudsman Remulla an isyu kan iheras sa publiko an naresibi kaining impormasyon.
Nanindugan si Atty. Baligod na dae pwedeng ikonsiderar na ‘intelligence’ an source kaini huli ta an ginibong rason iyo an sarong ladawan na kinuwa pirang taon na an nakaagi.
Inagyat niya an Ombudsman na akuon na mas pinakusog an mga ‘delivery’ kan mga maleta sa panahon ni Presidente Ferdinand ‘Bongbong’ Marcos Jr.
Ini suboot ngani na dae siya masabihan na nagbubuta-butahan sa mga alegasyon asin rebelasyon na piggigibo kan mga nagpamidbid na dating soldados.
Kun marumduman, sa ginibong pulong balitaan, pigbuyagyag ni Ombudsman Jesus Remulla na an saro sa mga ladawan kan ‘maleta delivery’ sa salaysay kan grupo an kinua kan panahon ni dating Presidente Rodrigo Duterte o former House Speaker Lord Allan Velasco.
Dugang pa ni Ombudsman Boying, base sa impormasyon, kwarta an laog kan mga maleta na suboot pigdedeliver.
Alagad sinabi niya na nagpoon ini antes an taon 2022 o an administrasyon ni Marcos Jr.
Sa ibong kaini, pigduon kan public tanod-bayan na importante man liwat na magsumiter kan kanya-kanyang ‘salaysay’ an 18 dating soldados.
Afuera kan joint-affidavit na dinara sa opisina, nagtutubod si Ombudsman Remulla na dapat man giraray magpresentar nin mga indibidwal o magkakasuway na testimonya basado sa personal na kaaraman.
