Pinahimutikan kan rookie player kan Ateneo de Manila University na si Kieffer Alas an mga nagluluwas na espekulasyon na igwang kinaaraman sa hazing o initiation rites an team-building activity na nauli sa trahedya asin ikinagadan ninda Divine Adili asin Rene Baterbonia.
Segun ki Alas, warang katotoohan an mga akusasyon asin dae suboot maiisip kan saindang mga beteranong pag-iriba na kulugan an siisay man na miyembro kan koponan.
Kaibanan ni Alas sa sarong intreviista an teammate na si Sam Reyes.
Ipinaliwanag kan duwa na an team-building activity sa sarong resort sa Aurora an parte kan saindang preparasyon sa paparaning UAAP Season 88.
Obheto suboot kaini na pakusugon an saindang samahan asin mental toughness kan mga players.
Segun pa kinda Alas asin Reyes na kaibanan sinda sa mga inanod nin harayo sa dagat makalihis an magkakasunod na makukusog na ukol rason ngani na magkaburulagan sinda.
Pag-istorya kaini na antes pa man an aktibidad, tinawan sinda kan mga coach nin orientation dapit sa peligro sa rip currents o makusog na ukol.
Dugang pa kan mga ini na inabisuhan man sinda na maghanda para sa magagabat na physical activities sa buhangin asin dagat bilang parte kan saindang training.
