Pigku-kwesyon kan kadalan an rason kan marikas na paglangkaw kan presyo kan petrolyo maski pa igwa pang natatada na stocks an mga gasolinahan.
Aram na nindo na kaibanan sa mga rason kaini an pagbase sa presyo kan langis sa Pilipinas sa pang-kinaban na merkado asin bako sa local stocks?
Pigagamit an benchmark na Mean of Platts Singapore (MOPS), na nagpapahiling kan urualdaw na trading price kan fuel sa Asia.
Nagkakaigwa nin adjustment an mga lokal na kumpanya kan langis sa presyo kan mga pump basado sa kada semana na average global prices.
Huli digdi, maski igwa pa nin natatadan stock nin gasolina, posibleng maglangkaw an presyo sa masunod na shipment asin amay na nagpapaotob nin adjustment an mga kumpanya ngani dae malugi.
Marurumduman na puon kan ipaotob an Downstream Oil Industry Deregulation Act of 1998 (RA 8479), dae na nakontrol kan gobierno an presyo kan langis.
Huli digdi, an mga kumpanya na kan langis an nagtatalaan kan presyo, na nakaka apektar sa global crude oil prices, foreign exchange rate kan piso kontra dolyar asin gastuson sa shipping asin refining.
An Department of Energy (DOE) man an nagsasagibo nin monitoring asin nagsi-sierto kan patas na kompetisyon.
Maski igwang lumang stocks sa mga gasolinahan, naglalangkaw man liwat an presyo huli sa padagos na deliveries asin magkakahalong batches sa mga tangke.
Pigsusundan man kan retailers an presyo na ipigtatalaan kan mga supplier.
An presyuhan an apektado kan mga global oil traders, mga desisyon kan OPEC sa produksyon, exchange rate kan piso kontra dolyar asin mga oil companies sa Pilipinas.
Huli ta kadaklan sa mga langis sa nacion an pig-aangkat, sensitibo an Pilipinas sa mga pagbabago sa pang-kinaban na merkado.// via Fuel Update
